CRPF शौर्य दिन

CRPF शौर्य दिन (९ एप्रिल )

भारताच्या केंद्रीय राखीव पोलिस दलाचा (CRPF) इतिहास हा शौर्याने भरलेला आहे. प्रत्येक वर्षी ९ एप्रिल हा दिवस “CRPF शौर्य दिन” म्हणून साजरा केला जातो. हा दिवस १९६५ साली साऱ्या देशाला प्रेरणा देणाऱ्या रणसंग्रामाची आठवण करून देतो, जिथे CRPF जवानांनी अतुलनीय धैर्य दाखवले आणि मातृभूमीच्या रक्षणासाठी आपले प्राण अर्पण केले.

हा दिवस भारताच्या केंद्रीय राखीव पोलिस दलाच्या (CRPF) अतुलनीय शौर्याची आणि बलिदानाची आठवण करून देतो. १९६५ मध्ये गुजरातमधील कच्छ सीमेवरील सरदार पोस्टवर पाकिस्तानच्या भयंकर हल्ल्याचा सामना करताना CRPFच्या वीर जवानांनी दाखवलेल्या असाधारण धैर्याच्या स्मरणार्थ हा दिवस पाळला जातो.

१९६५ साली, पाकिस्तानच्या ३५० सैनिकांनी गुजरातच्या कच्छ सीमेवरील सरदार पोस्टवर हल्ला चढवला. हा हल्ला परतवण्यासाठी तिथे तैनात असलेल्या CRPFच्या केवळ ९० जवानांनी अपार शौर्य दाखवले आणि संख्येने अधिक असलेल्या शत्रूला नमवले.

हे युद्ध केवळ शस्त्रांनी नव्हे, तर जिद्दीच्या बळावर लढले गेले.

CRPFच्या शिपायांनी अत्यंत शौर्याने लढत पाकिस्तानी सैन्याला माघार घ्यायला भाग पाडले. या संघर्षात CRPFचे सहा जवान शहीद झाले, परंतु त्यांनी ३४ पाकिस्तानी सैनिकांना ठार मारले आणि ४ जणांना बंदी बनवले. या युद्धाने (CRPF) च्या “संख्या नव्हे, तर शौर्यच निर्णायक असते!” या मूल्याची साक्ष जगासमोर ठेवली.

CRPF ची स्थापना २७ जुलै १९३९ रोजी क्राउन रिप्रेझेंटेटिव्ह पोलिस म्हणून झाली. त्यानंतर पुनर्स्थापना २८ डिसेंबर १९४९ रोजी झाली आणि CRPF कायदा लागू झाला.

सध्याची तुकडी २४६ बटालियन, ज्यामध्ये २०३ एक्झिक्युटिव्ह बटालियन, ६ महिला बटालियन, १० कोब्रा (कमांडो) बटालियन, १५ दंगली विरोधी (RAF) बटालियन, ५ व्हीआयपी सुरक्षा बटालियन, संसद सुरक्षा दल यांचा समावेश आहे. CRPFने भारतातील आणि आंतरराष्ट्रीय स्तरावरील अनेक लढायांमध्ये आपल्या धैर्याचा ठसा उमटवला आहे. भारतीय संसदेवरील हल्ला (२००१) आणि अयोध्या हल्ला (२००५) रोखला. नक्षलवाद, दहशतवाद आणि सीमेवरील सुरक्षेच्या क्षेत्रात महत्त्वपूर्ण भूमिका पार पाडली. आतापर्यंत CRPFच्या २२५५ जवानांनी मातृभूमीसाठी सर्वोच्च बलिदान दिले आहे. त्यांच्या शौर्यासाठी अशोक चक्र, कीर्ती चक्र, वीर चक्र, शौर्य चक्र, पोलिस पदके आणि अनेक राष्ट्रीय पुरस्कारांनी सन्मानित करण्यात आले आहे.

आजच्या तरुणांना या शौर्य दिनाच्या निमित्ताने समजले पाहिजे की, देशसेवा ही केवळ शब्दांपुरती मर्यादित नसून, ती कृतीतून दाखवावी लागते. CRPFच्या वीर जवानांनी आपले रक्त सांडून देशाचे रक्षण केले आणि त्यांनी आपल्याला प्रेरणा दिली की, देशाप्रती प्रेम हे निस्वार्थ असावे आणि जबाबदारीने पूर्ण केले पाहिजे.

“जोपर्यंत CRPFचे शूर जवान सीमा रक्षणासाठी उभे आहेत, तोपर्यंत कोणताही शत्रू आपल्या मातृभूमीकडे वाकडी नजर टाकू शकत नाही!”

जय हिंद! वंदे मातरम्!