पलक गुरू पुणेकर यांची स्वराज्य युवा संघटनेच्या महाराष्ट्र प्रदेशाध्यक्षा (तृतीयपंथी विभाग) पदी नियुक्ती;

पुणे | प्रतिनिधी

स्वराज्य युवा संघटनेच्या माध्यमातून तृतीयपंथी समाजाच्या प्रश्नांना मिळणार नवे व्यासपीठ!

स्वराज्य युवा संघटना (महाराष्ट्र राज्य) यांच्या वतीने सामाजिक कार्यात सक्रिय सहभाग नोंदवणाऱ्या पलक गुरू पुणेकर यांची महाराष्ट्र प्रदेशाध्यक्षा, तृतीयपंथी विभाग या पदावर अधिकृत नियुक्ती करण्यात आली आहे. संघटनेचे संस्थापक अध्यक्ष मा. राहुल आवटे यांच्या नेतृत्वाखाली ही नियुक्ती करण्यात आली असून, त्यांच्या निवडीमुळे सामाजिक क्षेत्रात आनंद व्यक्त केला जात आहे.

पलक गुरू पुणेकर या समाजहिताच्या कार्याबाबत जागरूक असून, विविध सामाजिक उपक्रमांच्या माध्यमातून समाजासाठी योगदान देण्याची त्यांची भूमिका महत्त्वपूर्ण आहे. त्यांची सामाजिक कार्याची आवड, कर्तव्यदक्षता आणि समाजाप्रती असलेली बांधिलकी लक्षात घेऊन स्वराज्य युवा संघटनेने त्यांच्यावर ही महत्त्वाची जबाबदारी सोपवली आहे.

या नियुक्तीमुळे तृतीयपंथी समाजाच्या विविध समस्या, हक्क, सन्मान, समान संधी, शैक्षणिक प्रगती, आरोग्य सुविधा आणि रोजगाराच्या प्रश्नांवर प्रभावीपणे काम करण्याची संधी उपलब्ध होणार आहे. तसेच समाजातील वंचित घटकांना न्याय मिळवून देण्यासाठी आणि त्यांना मुख्य प्रवाहात आणण्यासाठी जनजागृती व सामाजिक उपक्रम राबविण्याची अपेक्षा व्यक्त करण्यात येत आहे.

संस्थापक अध्यक्ष मा. राहुल आवटे यांच्या नेतृत्वाखाली स्वराज्य युवा संघटना महाराष्ट्रभर सामाजिक परिवर्तनासाठी कार्यरत राहण्याचा संकल्प घेऊन पुढे वाटचाल करत आहे. महाराष्ट्रातील विविध जिल्हे, तालुके, ग्रामीण भाग, गावे, वाड्या आणि वस्त्यांमधील नागरिकांच्या सामाजिक, शैक्षणिक व आरोग्यविषयक प्रश्नांसह शेतकरी आणि कामगारांच्या हक्कांसाठी आवाज उठविणे, हा संघटनेच्या कार्याचा महत्त्वाचा भाग आहे.

पलक गुरू पुणेकर यांना सोपविण्यात आलेली जबाबदारी त्या यशस्वीरीत्या पार पाडतील आणि त्यांच्या नेतृत्वाखाली तृतीयपंथी विभागाचे कार्य अधिक व्यापक, प्रभावी व लोकाभिमुख होईल, असा विश्वास संघटनेच्या वतीने व्यक्त करण्यात आला आहे.

“आपण समाजहितासाठी जागरूक राहून कर्तव्यदक्षपणे कार्य करत आहात, याचा स्वराज्य युवा संघटनेला अभिमान आहे. आपल्या माध्यमातून संघटनेचे कार्य अधिक बळकट होईल आणि समाजातील विविध घटकांना न्याय मिळवून देण्यासाठी नवे प्रयत्न होतील, अशी अपेक्षा आहे. आपल्या पुढील सामाजिक वाटचालीस मनःपूर्वक शुभेच्छा!”